اسلام آباد (اردو ٹائمز) اسلام آباد میں رائل تھائی آرمڈ فورسز ڈے کی پروقار تقریب

اسلام آباد – 12 فروری 2026 (اردو ٹائمز): اسلام آباد میں رائل تھائی آرمڈ فورسز ڈے کی پروقار تقریب پاک بحریہ کے ڈپٹی چیف وائس ایڈمرل سید احمد سلمان مہمانِ خصوصی تھائی دفاعی اتاشی کرنل نکھوم چمپو نے بڑھتے ہوئے عسکری روابط کو سراہا

اسلام آباد میں رائل تھائی آرمڈ فورسز ڈے کے موقع پر ایک پروقار استقبالیہ تقریب کا انعقاد کیا گیا، جس میں تھائی لینڈ کے دفاعی اتاشی کرنل نکھوم چمپو نے پاکستان اور تھائی لینڈ کے درمیان بڑھتے ہوئے دفاعی تعاون کو اجاگر کیا۔

پاک بحریہ کے وائس ایڈمرل سید احمد سلمان، ہلالِ امتیاز (ملٹری)، ڈپٹی چیف آف دی نیول اسٹاف نے تقریب میں بطور مہمانِ خصوصی شرکت کی۔ پاکستان میں تھائی لینڈ کے سفیر رونگ ودھی ویرابُتر، سفارتکاروں، دفاعی حکام اور دیگر مہمانوں کی بڑی تعداد بھی اس موقع پر موجود تھی۔

اپنے خطاب میں کرنل نکھوم چمپو نے کہا کہ آرمڈ فورسز ڈے ملک کی مسلح افواج کے افسران اور جوانوں کی پیشہ ورانہ صلاحیت، نظم و ضبط اور قومی خدمات کو خراجِ تحسین پیش کرنے کا دن ہے۔ انہوں نے کہا کہ یہ دن ان شہداء کی قربانیوں کو بھی یاد کرنے کا موقع فراہم کرتا ہے جنہوں نے تھائی لینڈ کی خودمختاری کے دفاع میں اپنی جانیں قربان کیں، جبکہ یہ قومی سلامتی اور علاقائی استحکام میں تھائی افواج کے کردار کا اعتراف بھی ہے۔

دوطرفہ تعلقات پر روشنی ڈالتے ہوئے انہوں نے کہا کہ پاکستان اور تھائی لینڈ کے درمیان 1951 میں سفارتی تعلقات کے قیام کے بعد سے دوستانہ روابط قائم ہیں، جو باہمی احترام اور اعتماد کی بنیاد پر وقت کے ساتھ مزید مضبوط ہوئے ہیں۔
انہوں نے 2021 میں دفاعی تعاون کے حوالے سے طے پانے والی مفاہمتی یادداشت (ایم او یو) کو ایک اہم سنگ میل قرار دیا، جس کے تحت دونوں ممالک کی مسلح افواج کے درمیان مکالمہ، تربیت اور پیشہ ورانہ تبادلوں کو فروغ ملا ہے۔

تھائی دفاعی اتاشی نے مزید کہا کہ تعاون کے دائرہ کار میں اعلیٰ سطحی اسٹاف مذاکرات، سروسز کے درمیان روابط، بین الاقوامی دفاعی اور بحری فورمز میں شرکت اور کمانڈ اینڈ اسٹاف کالجز میں تربیتی تبادلے شامل ہیں۔

انہوں نے اس عزم کا اعادہ کیا کہ رائل تھائی آرمڈ فورسز پاکستان اور دیگر شراکت دار ممالک کے ساتھ باہمی تعاون، بہتر ہم آہنگی اور عملی روابط کو مزید فروغ دینے کے لیے پرعزم ہیں۔