اسلام آباد (اردو ٹائمز) اسلام آباد میں ڈینگی کے چوبیس نئے کیسز، انسدادِ ڈینگی آپریشن مزید تیز

اسلام آباد (اردو ٹائمز) اسلام آباد میں ڈینگی کے چوبیس نئے کیسز، انسدادِ ڈینگی آپریشن مزید تیز
ڈسٹرکٹ ہیلتھ آفس اسلام آباد نے ڈینگی کی تازہ صورتحال اور انسدادِ ڈینگی اقدامات کے بارے میں رپورٹ جاری کی ہے۔

گزشتہ چوبیس گھنٹوں کے دوران ڈینگی کے چوبیس نئے کیسز رپورٹ ہوئے، جن میں سولہ مریض دیہی اور آٹھ شہری علاقوں سے تعلق رکھتے ہیں۔ ان میں سے پندرہ مریض اسپتال میں داخل کیے گئے۔ رواں سیزن میں اب تک مجموعی طور پر چار سو دس تصدیق شدہ کیسز سامنے آ چکے ہیں۔ تمام کیسز کا ریسپانس عالمی ادارۂ صحت کے مقررہ طریقہ کار کے مطابق مکمل کیا گیا ہے۔

انسدادِ ڈینگی مہم کے تحت متاثرہ مریضوں کے بیس گھروں پر ریزیڈول اسپرے کیا گیا جبکہ اردگرد کے علاقوں میں بھی کارروائی کی گئی۔ مزید پھیلاؤ کو روکنے کے لیے ایک سو ایک مقامات پر فوگنگ کی گئی۔ اب تک نو ہزار ایک سو پانچ مثبت لاروا سائٹس کا خاتمہ کیا جا چکا ہے جبکہ مجموعی طور پر اکتالیس ہزار چھ سو بیالیس انسدادِ ڈینگی سرگرمیاں انجام دی جا چکی ہیں۔

ڈسٹرکٹ ہیلتھ آفس اسلام آباد اور ڈائریکٹوریٹ آف ہیلتھ سروسز (سی ڈی اے/ایم سی آئی) کی ویکٹر کنٹرول ٹیمیں شہر بھر کے حساس اور ہائی رسک علاقوں میں مربوط اقدامات جاری رکھے ہوئے ہیں۔ اسپیشل آپریشنز کے تحت انسدادِ ڈینگی سرگرمیوں میں مزید تیزی لائی گئی ہے۔

ڈسٹرکٹ انتظامیہ نے ایس او پیز کی خلاف ورزی کرنے والوں کے خلاف جرمانے اور قانونی کارروائیاں بھی شروع کر رکھی ہیں۔

ڈسٹرکٹ ہیلتھ آفس نے عوام سے پرزور اپیل کی ہے کہ وہ احتیاطی تدابیر پر عمل کریں، بالخصوص پانی والے برتنوں، ٹینکوں اور کولرز کی باقاعدگی سے صفائی کریں تاکہ ڈینگی کے پھیلاؤ کو روکا جا سکے اور شہری اپنی اور دوسروں کی صحت کے تحفظ میں مؤثر کردار ادا کر سکیں۔