لاہور(اردو ٹائمز) وزیراعلیٰ محسن نقوی کا نظریہ پاکستان روڈ کا دورہ، پروٹیکٹیڈ یو ٹرنز کو ٹریفک کیلئے کھول دیا گیا
Share

نظریہ پاکستان روڈ پر ٹریفک کے مسائل حل کرنے کیلئے یوٹرنز بنائے گئے ہیں،شوکت خانم ہسپتال چوک کو بھی سگنل فری بنا دیا گیاہے
صوبائی اوریونیورسٹی لیول پر ہراسمنٹ سیل دو دن میں کام شروع کردیں گے:محسن نقوی
اسلامیہ یونیورسٹی بہاولپور سکینڈل کی تحقیقات کیلئے عدالت عالیہ کو جج نامز د کرنے کی درخواست دی ہے،امید ہے نامزدگی کے 15دن کے اندر رپورٹ سامنے آجائے گی. میڈیا سے گفتگو
لاہور31جولائی:نگران وزیراعلیٰ پنجاب محسن نقوی نے آج رات نظریہ پاکستان روڈ کا دورہ کیا اور نظریہ پاکستان روڈ پر بنائے گئے پروٹیکٹیڈ یو ٹرنز کو ٹریفک کے لیے کھول دیا ۔محسن نقوی نے کہا کہ نظریہ پاکستان روڈ پر ٹریفک کے مسائل حل کرنے کے لیے یوٹرنز بنائے گئے ہیں۔شوکت خانم ہسپتال چوک کو بھی سگنل فری بنا دیا گیاہے۔شہر کے اس اہم پوائنٹ کو سگنل فری بنانے سے یومیہ 45 ہزار گاڑیوں کوآمدورفت میں سہولت ملے گی۔انہوں نے کہا کہ واپڈا ٹاؤن، کینال بنک روڈ، جوہر ٹاؤن اور ملحقہ علاقوں کے رہائشی مستفید ہو سکیں گے۔منصوبے کی بروقت تکمیل پر کمشنر و ڈی جی ایل ڈی اے محمد علی رندھاوا،چیف انجینئر اسرار سعید اور انکی ٹیم شاباش کی مستحق ہے۔کمشنر لاہور و ڈی جی ایل ڈی اے محمد علی رندھاوا اور چیف انجینئر اسرار سعید نے وزیراعلی پنجاب کو بریفنگ دیتے ہوئے کہا کہ اس منصوبے کو 15 روز میں مکمل کیا گیا ہے اور ترقیاتی کاموں کے دوران ٹریفک کی روانی کو برقرار رکھا گیا ہے۔نظریہ پاکستان روڈ پر غفار چوک پر یو ٹرن بنایا گیا ہے۔نگران وزیراعلیٰ محسن نقوی نے میڈیا سے گفتگوکرتے ہوئے کہا کہ پنجاب میں یونیورسٹیوں میں ہراسگی کے واقعات کے سدباب کیلئے خاتون صوبائی سیکرٹری کی سربراہی میں کمیٹی قائم کی جائے گی۔طالبات کی پروٹیکشن کیلئے خاتون پروفیسرز کی سربراہی میں ہراسمنٹ سیل قائم ہوں گے ۔جو الیکشن کمیشن کہے گا وہ کریں گے۔سیاسی پارٹی کو خوش کرنے نہیں آئے۔صوبائی اوریونیورسٹی لیول پر ہراسمنٹ سیل دو دن میں کام شروع کردیں گے۔اسلامیہ یونیورسٹی بہاولپور سکینڈل کی تحقیقات کیلئے عدالت عالیہ کو جج نامز د کرنے کی درخواست دی ہے،امید ہے نامزدگی کے 15دن کے اندر رپورٹ سامنے آجائے گی۔والدین کیلئے یونیورسٹیوں میں زیر تعلیم بچیوں کے تحفظ کے احساس کو یقینی بنانا چاہتے ہیں۔بہاولپورسکینڈل میں کچھ حقیقت ہے اورکچھ مبالغہ آرائی سے کام لیا گیا۔ایف آئی اے سمیت اداروں کی رپورٹس آچکی ہیں لیکن جوڈیشنل کمیشن کی رپورٹ حتمی تصور کی جائے گی،جو بھی ملوث ہوا سزا سے نہیں بچ سکے گا۔نظریہ پاکستان روڈ کو مکمل طورپر سگنل فری کرنے کیلئے مزید دو یوٹرن بنائے جائیں گے۔ ڈی جی ایل ڈی اے کے موثر فالواپ کی وجہ سے ترقیاتی منصوبوں کی جلد تکمیل ممکن ہورہی ہے۔محرم الحرام اللہ کے فضل و کرم سے پرامن گزرا اوراب پولیس کی پوری توجہ جرائم پیشہ افراد کی سرکوبی پر ہوگی۔ جرائم کی شرح میں کمی آرہی ہے اورانشاء اللہ جلد مزید کمی آئے گی۔پولیس مقابلوں کا تاثر درست نہیں،جو پولیس پر گولی چلائے گا اسے ایسے ہی جواب ملے گا۔ صوبائی وزراء عامر میر،منصور قادر،سی سی پی او،کمشنر،ڈپٹی کمشنر،سی ٹی او،چیف انجینئر ایل ڈی اے اوردیگرحکام بھی موجود تھے۔