اسلام آباد (اردو ٹائمز) ایف آئی اے اینٹی ہیومن ٹریفکنگ سرکل اسلام آباد کی کارروائی — قازقستان اور عمان سے ڈی پورٹ ہونے والے تین مسافروں کے خلاف مقدمہ درج

اسلام آباد (اردو ٹائمز): ایف آئی اے اینٹی ہیومن ٹریفکنگ سرکل (اے ایچ ٹی سی) اسلام آباد نے غیر قانونی امیگریشن کے ایک کیس میں قازقستان اور عمان سے ڈی پورٹ ہونے والے تین مسافروں کے خلاف باقاعدہ مقدمہ درج کر لیا ہے۔

تحقیقات سے معلوم ہوا کہ ملزمان تحسین اللہ اور محمد رمضان ورک ویزے پر کرغزستان گئے تھے، تاہم بعد ازاں غیر قانونی طور پر قازقستان میں داخل ہونے کی کوشش کی جس پر انہیں ڈی پورٹ کر دیا گیا۔ تیسرے ملزم محمد عدنان کو عمان سے ڈی پورٹ کیا گیا۔ کسی بھی ملزم کے پاس پاکستان سے درست روانگی کا ریکارڈ موجود نہیں تھا۔

تمام تین ملزمان کے خلاف پاسپورٹ ایکٹ 1974 کی دفعات 3 اور 4 کے تحت مقدمہ درج کر لیا گیا ہے۔ تفتیش کے دوران ان افراد کو غیر قانونی طریقے سے بیرونِ ملک بھیجنے میں ملوث سہولت کاروں اور ایجنٹوں کا سراغ لگایا جائے گا اور ان کے خلاف بھی قانونی کارروائی کی جائے گی۔

ایف آئی اے اسلام آباد زون کا عزم ہے کہ انسانی اسمگلنگ اور غیر قانونی طریقے سے بیرونِ ملک سفر کے خلاف کارروائیاں بلا تعطل جاری رہیں گی۔