اسلام آباد (اردو ٹائمز) علی بن طارق ڈی پی او اٹک تعینات، محمد کامران خان اور عثمان اکرم گوندل کا شاندار خدمات، دیانت داری اور پیشہ ورانہ قیادت پر خراجِ تحسین

اسلام آباد (اردو ٹائمز) پنجاب حکومت نے پولیس سروس آف پاکستان کے سینئر افسر علی بن طارق کو ڈسٹرکٹ پولیس آفیسر (ڈی پی او) اٹک تعینات کر دیا ہے۔ اس ضمن میں تبادلہ و تقرری کے باقاعدہ احکامات جاری کر دیے گئے ہیں۔

علی بن طارق اس سے قبل بطور ڈی پی او لودھراں فرائض سرانجام دے رہے تھے، جہاں ان کی پیشہ ورانہ کارکردگی، مؤثر پولیسنگ، جرائم کے خلاف کارروائیوں اور عوامی خدمت کے حوالے سے خدمات کو پولیس حلقوں میں قدر کی نگاہ سے دیکھا جاتا ہے۔

ایڈیشنل انسپکٹر جنرل پولیس پنجاب محمد کامران خان نے علی بن طارق کی خدمات کو سراہتے ہوئے کہا کہ وہ ایک باصلاحیت، دیانت دار اور پیشہ ور افسر ہیں جنہوں نے ہر تعیناتی پر محکمانہ روایات اور عوامی خدمت کے اعلیٰ معیار کو برقرار رکھا۔ انہوں نے کہا کہ پنجاب پولیس کو ایسے افسران پر فخر ہے جو اپنی صلاحیتوں اور کردار سے ادارے کے وقار میں اضافہ کرتے ہیں۔

ریجنل پولیس آفیسر ملتان عثمان اکرم گوندل نے کہا کہ علی بن طارق نے لودھراں میں بہترین قائدانہ صلاحیتوں کا مظاہرہ کیا اور امن و امان کے قیام، جرائم کی روک تھام اور فورس کی پیشہ ورانہ استعداد کار میں بہتری کے لیے قابلِ قدر خدمات انجام دیں۔ انہوں نے امید ظاہر کی کہ وہ اٹک میں بھی اپنی ذمہ داریاں اسی جذبے، عزم اور پیشہ ورانہ مہارت کے ساتھ نبھائیں گے۔

پولیس ذرائع کے مطابق ضلع اٹک میں علی بن طارق کی تعیناتی کو ایک اہم انتظامی فیصلہ قرار دیا جا رہا ہے۔ اٹک اپنی جغرافیائی، انتظامی اور سیکیورٹی اہمیت کے باعث پنجاب کے نمایاں اضلاع میں شمار ہوتا ہے، جہاں مؤثر اور فعال پولیس قیادت امن و امان کے قیام میں بنیادی کردار ادا کرتی ہے۔

حکام اور پولیس افسران نے علی بن طارق کو نئی ذمہ داریاں سنبھالنے پر مبارکباد پیش کرتے ہوئے اس امید کا اظہار کیا ہے کہ ان کی قیادت میں اٹک پولیس عوامی خدمت، قانون کی عملداری اور جرائم کے خلاف مؤثر اقدامات کے حوالے سے مزید کامیابیاں حاصل کرے گی۔