اسلام آباد (اردو ٹائمز) فودان یونیورسٹی کی دستاویزی فلم “دی مون اِز یورز” کی قائداعظم یونیورسٹی میں نمائش

اسلام آباد – 20 مئی 2026 (عدنان حمید)(اردو ٹائمز) : فودان یونیورسٹی کی دستاویزی فلم “دی مون اِز یورز” کی قائداعظم یونیورسٹی میں نمائش

پاکستانی طلبہ نے چین میں اعلیٰ تعلیم کے مواقع میں گہری دلچسپی کا اظہار کیا

فلم نے پاک چین تعلیمی و ثقافتی روابط کو مزید مضبوط بنانے کا پیغام دیا

چین کی معروف فودان یونیورسٹی کی 102 منٹ پر مشتمل دستاویزی فلم “دی مون اِز یورز” کی پیر کے روز قائداعظم یونیورسٹی اسلام آباد میں خصوصی نمائش کی گئی۔ اس ڈاکیومنٹری کی ہدایت کاری معروف فلم ساز ونسنٹ ژو نے کی جبکہ اسے فودان یونیورسٹی کے اسکول آف جرنلزم کی ٹیم نے تین سال کے عرصے میں مکمل کیا۔

ڈاکیومنٹری میں شنگھائی میں زیر تعلیم بین الاقوامی طلبہ کی حقیقی زندگی، تعلیمی سفر اور مختلف ثقافتوں کے تجربات کو نمایاں انداز میں پیش کیا گیا ہے۔ یہ فلم پاکستان میں پہلی مرتبہ جبکہ بیرونِ ملک چوتھی بار نمائش کے لیے پیش کی گئی، جس کا مقصد پاکستانی طلبہ کو چین میں اعلیٰ تعلیم کے مواقع سے آگاہ کرنا تھا۔

فودان یونیورسٹی کے اسکول آف جرنلزم کی جانب سے منعقدہ اس تقریب میں قائداعظم یونیورسٹی کے ایک سو سے زائد طلبہ اور اساتذہ نے بھرپور شرکت کی۔ یونیورسٹی انتظامیہ کے مطابق آئندہ دو روز کے دوران پاکستان کی مزید دو جامعات میں بھی اس ڈاکیومنٹری کی نمائش کی جائے گی تاکہ زیادہ سے زیادہ پاکستانی نوجوانوں تک “اسٹڈی اِن چائنا” پروگرام کا پیغام پہنچایا جا سکے۔

تقریب سے خطاب کرتے ہوئے فودان یونیورسٹی کے اسکول آف جرنلزم کے نائب ڈین شیا تیانیی نے فلم کی تیاری، اس کے موضوعات اور بین الاقوامی طلبہ کے تجربات پر روشنی ڈالی۔ ان کا کہنا تھا کہ یہ ڈاکیومنٹری چین میں زیر تعلیم غیر ملکی طلبہ کی حقیقی زندگی اور ثقافتی ہم آہنگی کی عکاسی کرتی ہے۔

ڈاکیومنٹری کی نمائش کے بعد فودان یونیورسٹی کی جانب سے پاکستانی طلبہ کے لیے خصوصی ایڈمیشن بریفنگ بھی دی گئی، جس میں مختلف تعلیمی پروگرامز، اسکالرشپس اور چین میں تعلیم کے مواقع کے بارے میں تفصیلی معلومات فراہم کی گئیں۔

قائداعظم یونیورسٹی کے شعبہ سیاست و بین الاقوامی تعلقات کے لیکچرار سلمان علی بھٹانی نے کہا کہ یہ نمائش “اسٹڈی اِن چائنا” اقدام کے لیے ایک اہم سنگِ میل ثابت ہوگی اور بصری کہانیوں کے ذریعے پاکستان اور چین کے درمیان تعلیمی و ثقافتی روابط مزید مضبوط ہوں گے۔

قائداعظم یونیورسٹی کی 22 سالہ طالبہ طیبہ نے پیپلز ڈیلی سے گفتگو کرتے ہوئے کہا کہ اس فلم نے پاکستانی نوجوانوں میں چین میں اعلیٰ تعلیم حاصل کرنے کے رجحان کو مزید تقویت دی ہے۔ ان کے مطابق فودان یونیورسٹی چین کی ممتاز اور عالمی شہرت یافتہ جامعات میں شمار ہوتی ہے۔

انہوں نے کہا کہ پاکستانی طلبہ کے لیے چین میں تعلیم حاصل کرنا اور پاک چین تعاون میں اپنا کردار ادا کرنا ایک بہترین انتخاب ثابت ہو سکتا ہے۔