راولپنڈی (اردو ٹائمز) راولپنڈی اڈیالہ روڈ پر گرین بس نے موٹر سائیکل کو ٹکر مار دی۔ جس کے نتیجے میں موٹر سائیکل پر سوار 9 سالہ بچی جاں بحق ہوگئی جبکہ اس کا والد اور دوسری بچی محفوظ رہے۔ جاں بحق بچی کی شناخت عائشہ مقبول کے نام سے ہوئی ہے۔
ابتدائی اطلاعات کے مطابق ایک شخص اپنی دو بچیوں کے ہمراہ موٹر سائیکل پر اڈیالہ روڈ سے گزر رہا تھا کہ گرین بس کی زد میں آگیا۔ حادثے میں عائشہ مقبول شدید زخمی ہوئی اور موقع پر ہی دم توڑ گئی۔۔
حادثے کے فوراً بعد موقع پر موجود شہریوں نے بس ڈرائیور کو قابو کرلیا جبکہ مشتعل افراد نے بس کے شیشے توڑ دئیے۔ اطلاع ملتے ہی پولیس موقع پر پہنچ گئی اور ڈرائیور کو تحویل میں لے کر واقعے کی تفتیش شروع کر دی۔
پولیس کے مطابق حادثے کی وجوہات اور ذمہ داری کا تعین شواہد اور تحقیقات کی روشنی میں کیا جائے گا۔ واقعے کے بعد اڈیالہ روڈ پر ٹریفک کی روانی بھی متاثر ہوئی۔