استنبول (اردو ٹائمز) چیئرمین پیراگون گروپ بلال عادل ترکیہ میں ‘ایکسیلینس ایوارڈ’ سے نوازا گیا

استنبول (اردو ٹائمز): اسلام آباد چیمبر آف کامرس اینڈ انڈسٹری (آئی سی سی آئی) کے زیرِ اہتمام ترکیہ کے تاریخی شہر استنبول میں 13 اور 14 اگست کو دو روزہ ‘بزنس اپرچونٹی کانفرنس اور ایکسیلنس ایوارڈز’ کی باوقار تقریب کا انعقاد کیا گیا، جس میں پاکستان سے تقریباً 200 رکنی اعلیٰ سطحی کاروباری وفد نے شرکت کی۔
اس اہم بین الاقوامی کانفرنس کے دوران پیراگون گروپ آف کمپنیز کے چیئرمین و سی ای او بلال عادل کو کاروباری اور ٹیکسٹائل کے شعبے میں ان کی نمایاں، مخلصانہ اور غیر معمولی خدمات کے اعتراف میں گورنر استنبول کی جانب سے خصوصی ‘ایکسیلینس ایوارڈ’ سے نوازا گیا۔
پاکستان ترکیہ تجارتی روابط کا نیا دور:
اس اعلیٰ سطحی تجارتی کانفرنس کا بنیادی مقصد پاکستان اور ترکیہ کے مابین دوطرفہ تجارت، سرمایہ کاری اور باہمی کاروباری روابط کو مزید فروغ دینا اور دونوں برادر ممالک کی کاروباری برادری کے لیے نئے سازگار مواقع پیدا کرنا تھا۔ تقریب میں پاکستانی سفارتی حکام، استنبول چیمبر آف کامرس کے ایگزیکٹو بورڈ کے معزز اراکین اور استنبول کی اعلیٰ حکومتی و سفارتی شخصیات سمیت پاکستان اور ترکیہ کی بزنس کمیونٹی کے ممتاز نمائندوں نے بھرپور شرکت کی۔نوجوان بزنس لیڈرز کی حوصلہ افزائی:
ایوارڈز کی تقریب کے دوران ٹیکسٹائل اور دیگر مختلف شعبوں میں نمایاں کارکردگی دکھانے والے کاروباری افراد، بالخصوص ابھرتی ہوئی نوجوان کاروباری شخصیات کو ان کی محنت اور اختراعی صلاحیتوں پر ایکسیلنس ایوارڈز دیے گئے۔
کانفرنس کے منتظمین کے مطابق، اس تقریب کا بنیادی محور جہاں ایک طرف ہونہار اور نوجوان بزنس لیڈرز کی حوصلہ افزائی کرنا تھا، وہیں اس کا بڑا مقصد پاکستان اور ترکیہ کے درمیان مشترکہ کاروباری تعاون، دوطرفہ سرمایہ کاری کے حجم کو بڑھانا اور تجارتی شراکت داری کے نئے افق کو مزید وسعت دینا ہے۔