رباط، 28 ستمبر 2026 (اردو ٹائمز):
مراکش کے فرمانروا شاہ محمد ششم نے سعودی عرب پر حوثی حملوں کی شدید مذمت کی ہے۔
انہوں نے سعودی عرب کی سلامتی، خودمختاری اور مقدس مقامات کے تحفظ پر زور دیا
شاہ محمد ششم نے کہا کہ سعودی عرب پر کسی بھی جارحیت کو مراکش کے خلاف جارحیت تصور کیا جائے گا۔
مراکش کے فرمانروا شاہ محمد ششم نے سعودی عرب کے فرمانروا شاہ سلمان بن عبدالعزیز آل سعود اور ولی عہد و وزیراعظم شہزادہ محمد بن سلمان بن عبدالعزیز آل سعود کے نام پیغامات میں سعودی عرب پر حوثی ملیشیاؤں کے مسلسل حملوں کی شدید مذمت کی ہے۔
شاہ محمد ششم نے سعودی عرب کی خودمختاری، سلامتی اور استحکام کے ساتھ مکمل یکجہتی کا اظہار کرتے ہوئے کہا کہ حملوں میں شہری و اقتصادی تنصیبات، بنیادی ڈھانچے، شہروں اور رہائشی علاقوں کو نشانہ بنایا گیا، جبکہ مکہ مکرمہ اور مدینہ منورہ جیسے مقدس مقامات کو لاحق خطرات انتہائی تشویش ناک ہیں۔
مراکشی فرمانروا نے کہا کہ سعودی عرب کی سلامتی اور خلیجی ممالک کا استحکام مراکش کی سلامتی سے منسلک ہے اور سعودی عرب کے خلاف کوئی بھی جارحیت مراکش کے خلاف جارحیت تصور کی جائے گی۔ انہوں نے کہا کہ مراکش سعودی عرب اور دیگر عرب خلیجی ممالک کے ساتھ کھڑا ہے۔
انہوں نے خبردار کیا کہ ایسی کارروائیاں پورے خطے کے امن و استحکام کو متاثر کرنے کے ساتھ ساتھ اہم بحری راستوں کے لیے بھی خطرات پیدا کرتی ہیں، جو عالمی معیشت اور بین الاقوامی بحری نقل و حرکت کے تحفظ کے لیے انتہائی اہم ہیں۔
شاہ محمد ششم نے ان حملوں کو بین الاقوامی قانون اور متعلقہ اقوام متحدہ کی قراردادوں کی خلاف ورزی قرار دیتے ہوئے قرارداد 2216 (2015) اور قرارداد 2722 (2024) کا حوالہ دیا۔ انہوں نے شہری علاقوں، اقتصادی بنیادی ڈھانچے اور مقدس مقامات کو نشانہ بنانے کی مذمت کرتے ہوئے خطے کے امن، استحکام اور اہم بحری راستوں کے تحفظ پر زور دیا۔