تحریر: ریحان خان
اسلام آباد، بدھ، 12 مارچ 2025 (اردو ٹائمز): ایرانی وزارتِ خارجہ کے ترجمان اسماعیل بقائی نے بلوچستان میں مسافر ٹرین پر دہشتگرد حملے اور یرغمال بنانے کے واقعے کی شدید مذمت کرتے ہوئے معصوم شہریوں کی سلامتی کو لاحق خطرات پر گہری تشویش کا اظہار کیا ہے۔
ایک سرکاری بیان میں، اسماعیل بقائی نے دہشتگردی اور پرتشدد انتہا پسندی کی ہر شکل کے خلاف ایران کے اصولی موقف کا اعادہ کیا۔ انہوں نے اس نازک وقت میں پاکستان کی حکومت اور عوام کے ساتھ مکمل یکجہتی کا اظہار کیا۔
مزید برآں، انہوں نے اس دہشتگردانہ کارروائی کے خاتمے اور متاثرین کی سلامتی کو یقینی بنانے کے لیے ایران کی ہر ممکن مدد فراہم کرنے کی آمادگی ظاہر کی۔
دوسری جانب، اسلام آباد میں ایرانی سفارتخانے نے بھی بلوچستان میں مسافر ٹرین پر ہونے والے دہشتگرد حملے کی شدید مذمت کی ہے، جس میں خواتین، بچوں اور بزرگوں سمیت معصوم شہریوں کو یرغمال بنایا گیا۔
ایرانی سفارتخانے نے اس حملے کو ‘بزدلانہ انسانیت سوز جرم’ قرار دیتے ہوئے کہا کہ شہریوں کو نشانہ بنانا اور اہم سفری بنیادی ڈھانچے کو نقصان پہنچانا انسانی حقوق اور بین الاقوامی قوانین کی سنگین خلاف ورزی ہے۔