سابق وزیر خزانہ اور مسلم لیگ ن کے سینیٹر اسحاق ڈار کا کہنا ہے اتحادی حکومت کے دور رس اقدامات کی وجہ سے ملکی معیشت بہتر اور پاکستانی روپیہ مستحکم ہو رہا ہے۔
گورنر پنجاب محمد بلیغ الرحمان سے سابق وفاقی وزیر خزانہ اسحاق ڈار نے ملاقات کی جس میں ملک کی معیشت اور موجودہ صورتحال پر تبادلہ خیال کیا گیا۔
اس موقع پر گورنر پنجاب کا کہنا تھا اسحاق ڈار نے ہر مشکل وقت میں ملک کی معیشت کو سنبھالا اور صحیح ڈگر پر ڈالا، اسحاق ڈار نے ایٹمی دھماکوں کے بعد معاشی پابندیوں کے باوجود معیشت کو گرداب سے نکالا تھا، ماضی قریب میں ملک کو ڈیفالٹ سے بچانے کے لیے اسحاق ڈار کی نواز شریف اور ان کی ٹیم کے ساتھ کوششیں کامیاب رہیں۔
بلیغ الرحمان کا کہنا تھا نواز شریف کی 21 اکتوبر کو وطن واپسی عوام کے لیے امید کی کرن ہے، تاریخ گواہ ہے نواز شریف نے ہمیشہ ملک کی خدمت کی ہے، نواز شریف کے ادوار میں ملک نے بے پناہ ترقی کی، ملک بھر میں موٹر ویز کے جال بچھے، اسپتال اور یونیورسٹیاں بنیں۔
اس موقع پر سینیٹر اسحاق ڈار کا کہنا تھا گزشتہ اتحادی حکومت کے دور رس اقدامات کی وجہ سے آج ملک کی معیشت بہتری کی طرف گامزن ہے، ڈالر کے مقابلے میں روپیہ مستحکم ہو رہا ہے۔
اسحاق ڈار کا کہنا تھا نواز شریف 21 اکتوبر کو وطن واپس آ رہے ہیں، عوام کو نواز شریف سے بہت زیادہ امیدیں ہیں