سویلی ایشیاٹی تزویراتی توازن ءِ دُوارہ قائم کننگ و کشمیر نا ویل ءِ ایسر کرسا امن نا کنڈآ ہِننگ نا گرج ءِ، مسعود خان

پاکستان سویلی ایشیاٹی تزویراتی توازن ءِ دُوارہ قائم کننگ و دہائی تیا متکن اقوام متحدہ نا تسلیم مروک جھیڑہ ءِ سفارت کاری نا کمک اٹ ایسر کرسا ڈیہہ ءِ امن نا کنڈآ دننگ آ زور شاغانے۔ داہیت ءِ امریکہ ٹی پاکستان نا سفیر مسعود خان ٹیکساس اٹی ڈپلومیسی نا بابت اسہ کانفرنس اسے ٹی پارے۔ کانفرنس ءِ انٹرنیشنل اکیڈمی آف لیٹرز اڈتسوسس ہرا دودوربیدگی و السی سفارت کاری نا کمک اٹ تعلقداری جوڑ کننگ نا کوشست کروک آ تھنک ٹینک ءِ۔ ترانکارآتیٹی امریکی اسٹیٹ ڈپارٹمنٹ نا سینئر کارندہ الزبتھ ہورسٹ ہم اوار ئسک۔ مسعود خان پارے کہ دا المی ءِ کہ سویلی ایشیاٹی سٹریٹجک توازن ءِ دُوارہ قائم کننگے۔ اونا پاننگ ئسک کہ ننے جموں وکشمیر نا جھیڑہ ءِ ایسر کننگ و جوہری سوگوی ءِ پک کننگ کن ہڑتوم آ کنڈآتا، مسٹ میکو فریق و کثیر جہتی سفارت کاری نا سیبوءِ ہلنگے۔ داہیت انا پیدواری ءِ کرسا پارے کہ امریکہ ہند۔ بحرالکاہل ناحکمت عملی ناترتیب ٹ سنگت آتے گچین کرینے۔ مسعود خان پارے کہ پاکستان تینا اقتصادی جغرافیہ غان فائدہ ہرفنگ کن چین پاکستان اقتصادی راہداری نا کمک اٹ  رابطہ غاتے ودفنگ نا کوشست کرینے، چین اتون ننا دفاعی و اقتصادی تعلقداری برجاسلک۔ اوپارے کہ پاکستان سلامتی واقتصادی تعلقداری تا پبی شونداری ءِ پک کننگ کن امریکہ تون اواری اٹ کاریم کننگ ءِ۔ ملک انا بنداوی پنجر ناشونداری، توانائی نا ڈٹ، کشت وکشار،صنعت وسپلائی چین اٹی واشنگٹن نا ودوک آ شریداری نا ستاءِ کینہ۔