پاکستان دنیا اچ امن تے خوشحالی چاہندے ، سانجھے تعاون نال پاکستان اتے سوئٹزرلینڈ کوں قدرتی آفات توں تحفظ اچ مدد ملسی، وزیراعظم محمد شہباز شریف

وزیراعظم محمد شہباز شریف آکھیے پاکستان دنیا اچ امن تے خوشحالی چاہندے ، سانجھے تعاون نال پاکستان اتے سوئٹزرلینڈ کوں قدرتی آفات توں تحفظ اچ مدد ملسی، ہفتے کوں اتھاں پاکستان تے سوئٹزرلینڈ وچال قدرتی آفات نال نبݨݨ دے حوالے نال ݙوہیں ملکاں وچال تعاون دے ودھارے کیتے مفاہمت دی یاداشت تے دستخط کرݨ کرݨ دی تقریب توں خطاب کریندے ہوئیں وزیراعظم محمد شہباز شریف آکھیے پاکستان اتے سوئٹزرلینڈ وچال ایم او یو تے دستخط ھک وݙا قدم اے جیں توں مستقبل اچ قدرتی آفات نال نبݨݨ کیتے ݙوہیں ملکاں ٹیکنالوجی اتے ھک ݙوجھے توں تجربیں توں فیدہ چا سڳسن ۔ وزیراعظم مزید آکھیے جو پاکستان کوں قدرتی آفت توں بچاوݨ کیتے آگاہی ݙیوݨ دے جدید نظام سودھے ٻیان سہولتاں دی دستیابی کیتے تعاون ودھاوݨ چاہندوں ، انہاں زور ݙے تے ݙکھیے جو پاکستان عالمی ماحولیاتی تبدیلی دے اثرات توں ٻہوں زیادہ متاثر تھیندا پئے جݙاں جو کاربن دے اخراج اچ ساݙے ملک دا حصہ ٻہوں گھٹ اے ۔ وزیراعظم اے خواہش کیتی جو پاکستان سوئٹزرلینڈ نال مختلف شعبیں خصوصاً سیاحت دے شعبہ اچ تعاون ودھاوݨ چاہندے ، انہاں آکھیے پاکستان خوبصورت قدرتی مناظر توں مالا مال اے۔ سوئس وزیر خارجہ دی طرفوں خطے اچ امن و امان دے تاثرات تے وزیراعظم آکھیے خطے اچ امن وامان دا قیام ٻہوں ضروری اے اتے سوئٹزرلینڈ خطے اچ امن وامان ودھاوݨ اچ اہم کردار ادا کرسڳدے